Баланың шәхес булып формалашуы, иң беренче чиратта, гаилә тәрбиясенә бәйләнгән. Ата-ана – төп тәрбиячеләр. Гаилә тормышын җайга салмыйча, ата-аналар белән даими  эшләмичә, тәрбия эшендә уңышларга ирешү мөмкин түгел. Шушы максатны күздә тотып, 13 сентябрь көнне мәктәптә ата-аналар җыелышы булып узды. Мәктәп директоры  Сабирҗанова Н.Б. узган уку елының ЕГЭ нәтиҗәләре,  5 нче хезмәт чирегенә карата үз фикерләрен әйтте, 2016-2017 уку елында мәктәптә эшлиячәк түгәрәкләр, эчке тәртип кагыйдәләрен искә төшерде. Сеҗе авыл җирлеге башлыгы Гыйбадуллина Г.М. мәктәп эшчәнлеген уңай бәяләп чыгыш ясады. Участок инспекторы Шайхутдинов З.Т. укучыларның җәмәгать урыннарында үз-үзләрен тотышлары, юллардагы куркынычсызлык кагыйдәләрен кабат искә төшерде. Тәрбия эшләре буенча директор урынбасары Шакирова Л.Х. “Гаилә һәм балалар арасындагы каршылыклар һәм аларны бетерү юллары” исемле чыгыш ясады. Тәрбиянең төп асылы – мәктәп белән гаиләнең бердәмлегендә. Мәктәп һәм гаилә тәрбиясе бербөтен булганда, балага бердәм таләп куелганда гына әлеге эш шатлыклы, ике якка да канәгатьләнү хисе бирә торган һәм уңышлы була ала.