Печмәнтау башлангыч мәктәбе укучылары сугыштан кайтмый калганнар истәлегенә куелган обелискны һәрвакыт чиста тоталар. Кыш көне әйләнә-тирәсендәге карларын көриләр, себерәләр. 

  20 нче январь көнне мәктәптә ата-аналар җыелышы үтте. Монда 1-9 сыйныф укучыларының әти-әниләре катнашты. Җыелыш ике өлештән торды. Мәктәп директоры Мустафина Альбина Виниаминовна  беренче яртыеллык нәтиҗәләре, соңгы яңалыклар белән таныштырды, ата-аналар өчен файдалы һәм эчтәлекле чыгыш ясады,  ОГЭ яңалыклары, аның мөһимлеге, аңа әзерләнү чаралары турында укыту эшләре буенча директор урынбасары Гарипова Нурия Илһамовна таныштырды.  Шулай ук тәрбия өлкәсендә ата-аналарның бурычлары кабат искәртелде. "Бала тәрбияләүдә ата - ананың җаваплылыгы" дигән темага 9 класс җитәкчесе Ахметгалиева Әминә Хәйдәровна чыгыш ясады.Җыелышның икенче өлеше классларда узды. Классларда укыту - тәрбия эшләре,  куркынычсызлык кагыйдәләрен үтәү мәсьәләләре тикшерелде.

Иске Кенәр башлангыч мәктәбе укучылары да "Кошларга-җимлек" акциясенә бик теләп кушылдылар.

   Иске Ашыт төп гомуми белем мәктәбе класс җитәкчеләре   укучыларның өйләрендә булдылар. Әти – әниләр, балалар арасында  янгын куркынычсызлыгын кисәтү буенча аңлату эшләре алып бардылар, кагыйдәләр җыелмасы – белешмәлек  тапшырдылар.

  Мәктәп авыл мәдәният йорты һәм китапханәсе белән тыгыз элемтәдә яши. 18 нче январь көнне авыл китапханәчесе Магсумова Г.Г. башлангыч класс укучылары белән "Саулык - зур байлык" дигән тәрбия чарасы үткәрде. Чарада  укучылар   сәламәт яшәү рәвеше белән таныштылар, таза-сәламәт яшәү өчен тормыш рәвешенең зур әһәмияткә ия икәненә төшенделәр.

Физкультура  дәресләрен укучылар көтеп алалар. Җилсез җылы көннәрдә саф һавада чаңгы шуу бигрәк тә күңелле һәм сәламәтлек өчен файдалы. Чаңгы юллары безне  көтә!

 Кыш көне рәхәтләнеп чана шуасың,чаңгыда йөрисең, шугалакта хоккей уйныйсың. Безнең мәктәп укучылары өчен бик шәп шугалак ясап куелды.  Физкультура дәресләре дә бик күңелле үтә. Иске Ашыт, Иске Кенәр, Печмәнтау авылы командалары арасында хоккей ярышларын карарга бөтен авыл халкы җыелды. Ярышта Иске Ашыт командасы җиңүгә иреште.

Печмәнтау башлангыч мәктәбендә "Рәхмәт - зур сүз" дигән темага тәрбия сәгате үтте. Укучылар гап-гади генә "рәхмәт" сүзенең нинди зур мәгънәгә ия булуына төшенделәр. Уеннар, мәкальләр, табышмаклар балаларда зур кызыксыну уятты.

    9 нчы январь көнне Арчада волейбол фестивале үтте. Анда безнең мәктәп командасы 3 урынны яулады. Команда егетләрен ( Гарипов Илүс, Шангараев Әнәс, Ахметов Ранил, Борханов Рәсим, Гайнуллин Наил, Биктов Илсаф, Файзрахманов Илшат, Шарафиев Ислам) һәм җитәкчеләре Саляхов Г.Г.ны чын күңелдән җиңүләре белән котлыйбыз. Молодцы!

    Каникуллар файдалы һәм кызыклы үтә. Укучылар чана, чаңгы шуалар, спорт ярышларында катнашалар. Шул ук вакытта имтиханнарга да әзерләнәләр. Көн саен 9 нчы класслар өчен имтиханга әзерлек максатыннан консультацияләр үткәрелә. Бүген алар Яңа Кенәргә рус теленнән сынау имтиханы бирергә менделәр.