Сәламәтлек - ул кешедә булган иң зур байлык. Аны акчага  сатып алып булмый.  Шуның өчен озак hәм бәхетле яшисең килсә, булган сәламәтлекне ныгыту, саклау турында кайгыртырга ,үзең өстендә бик күп эшләргә кирәк. Спорт-ул кешенең сәламәтлеге, тормышта бик кирәк булган түземлелек, сабырлык , батырлык, ихтыяр көче тәрбияләүче. Шуны истә тотып, безнең мәктәп укучылары да вакытларын бушка уздырмыйлар. Рәхәтләнеп чаңгыда шуалар, хоккей уйныйлар. 3 нче февральдә  егетләребез   хоккей уйнадылар. Уенда “Сәләт”  һәм “Дуслык” командасы көч сынашты. 11: 5 исәбе белән “Сәләт” командасы җиңү яулады. 

Патриотик тәрбия дигәндә, без балаларны милли үзаңга һәм гражданлык хисенә ия булган шәхесләр, Ватанга лаеклы уллары, кызлары итеп тәрбияләүне күздә тотабыз. Гражданлык хисенә ия булу җәмгыятьнең һәм дәүләтнең иҗтимагый әһәмиятле мәсьәләләренә югары әхлаклы мөнәсәбәтне белдерсә, “патриотлык” төшенчәсе киңрәк мәгънәне аңлата. Бу-Ватанга мәхәббәт хисе, аның тарихы, мәдәнияты, казанышлары белән кызыксыну; милли символларга, изге урыннарга хөрмәт белән карау; җәмгыятькә һәм халкыңа хезмәт итәргә әзер булу. Кем ул патриот? Патриотизм нәрсә ул? Татар теленең аңлатмалы сүзлегендә болай бирелә: “патриот – үзенең туган җирен, халкын, илен, ватанын сөюче, шулар өчен һәртөрле корбаннарга әзер булган кеше. Патриотизм – патриотларга хас булган күренеш (эш, теләк, хис); үз илеңә, халкыңа мәхәббәт”. Хәрби-патриотик тәрбия һәм оборона-масса  эше  айлыгы кысаларында  4 нче класста “Ленинград блокадасы” темасы буенча батырлык сәгате узды, видеоролик күрсәтелде. 

“Кешене рухи яктан мөстәкыйль тормышка әзерләү

 өчен аны китаплар дөньясына алып керергә кирәк.

         Китап һәр тәрбияләнүченең дустына, тәрбиячесенә

                           һәм тирән акыллы укытучысына әйләнергә тиеш”

(В.А.Сухомлинский “Йөрәгемне балаларга бирәм”)

 Бүген мәктәбебездә – шигърият бәйрәме. Укучылар китапның  авторы, исеме белән таныштырдылар. Сәнгатьле итеп шигырь укыдылар, яттан сөйләделәр. “Китапханәдә”рольле-сюжетлы уены аша китапханәдә үзләрен әдәпле тотарга, китапханәчедән дөрес итеп китап сорап алырга өйрәнделәр. “Китапларга  иллюстрация”исемле конкурска нәтиҗәләр ясалды. Укучыларның хезмәте уңай бәяләнде. Алар барысы да призлы урыннарга лаек булдылар. Җиңүчеләргә грамоталар тапшырылды.

Ватанны саклаучылар көненә багышланган хәрби-патриотик айлык кысаларында 9 класста Бөек Ватан сугышына багышланган тәрбия сәгате үтте.  Класс сәгатендә укучылар кораллы көчләр тарихы белән таныштырылды. Укучылар “Бөек Ватан сугышында минем гаиләм” дигән темага чыгышлар ясадылар.  Һәр укучы үз гаиләсеннән сугышта катнашкан яки тылда хезмәт күрсәткән әби-бабайсы, аларның батырлыклары турында сөйләде.Шулай ук Сталининград блокадасы турында видеоролик күрсәтелде. Бу турыда фикер алышу үткәрелде. Безнең рәхәт томышта яшәвебез өчен үзләренең гомерләрен биргән авылдашларыбыз, якташларыбызга без бурычлы. Укучылар хәзерге тормышның матурлыгын тоеп, кадерен белеп яшәргә кирәк дигән нәтиҗәләргә килделәр.  

Бүген безнең мәктәптә – “Әкият геройлары парады”. Укучылар әкият геройлары костюмнары әзерләгәннәр. “Сәхнә”дә алар үз героен яклап чыгыш ясадылар.Сорауларга җавап бирделәр. Әкиятләрдән өзекләрне сәхнәләштерделәр. “Әдәби фикер” уены барлык балаларга да ошады. Бергәләшеп биеделәр, күңелле итеп үзара аралашырга да өйрәнделәр. “Вакытның үткәнен сизми дә калдык”, - дип белдерделәр балалар. Мондый чаралар бушка вакыт үткәрү генә булып калмас, бала күңеленә мәрхәмәтлелек орлыклары салыныр, дип ышанабыз.

31 январьда Носы мәктәбендә 7-8 класс  һәм  9 класс егетләре арасында хоккей  ярышлары булып узды.  Уен бик киеренке булды. 9 класс егетләре җиңү яуладылар. 

31 нче январь көнне мәктәбебездә әти-әниләр җыелышы узды.  Һәр класста ачык дәресләр күрсәтелде. Җыелышның гомуми өлешендә II чирек нәтиҗәләренә анализ ясалды, уңышлар һәм проблемалар турында әйтелде. “Интернет куркынычсызлыгы”  темасына чыгыш ясалды.

“Әкиятләр кичә”се балаларның чыгышлары белән башланды. Укучылар  төрле әкиятләрнең эчтәлеген сөйләделәр. Геройларның характерын ачу максатында тавыш көчен үзгәртергә өйрәнделәр. Барлык мәктәп балалары каршында чыгыш ясау җаваплылык хисе тәрбияли. Укучылар әкиятләрнең һәр кешедә яхшы сыйфатлар тәрбияләвен  расладылар. “Нәрсә артык?”, “Бу геройлар кайсы әкияттән?”, “Бу предметлар кайсы әкияттән качканнар?” уеннары балаларның фикерләү дәрәҗәсен үстерә. Балаларга тәрбия бирүдә әкиятләрнең әһәмияте зур.

Китап атналыгының беренче көнендә “Табышмаклар кичә”се оештырылды. Укучылар арасында рус милләтеннән булган бала да булу сәбәпле, кичә татар һәм рус телендә алып барылды. Укучылар табышмаклар өйрәнеп килгәннәр. Төрле темага булган табышмакларның җавапларын табу балаларга аеруча ошый. Мәктәп буенча “Иң зирәк укучы” конкурсында 1 нче урынны  Петров К. һәм Миннебаев Д., 2 нче урынны Егоров Р. һәм Николаев Р., 3 нче урынны Галиев Ф. яуладылар. Татар халкының борынгы уеннарын кызыксынып өйрәнделәр. Укучылар белән берлектә, икенче көнгә максатлар билгеләдек.1нче класс укучылары да башкалардан калышмаска, әкиятләр укып, эчтәлеген сөйләргә өйрәнергә  сүз бирделәр.

27 нче январь көнне  Иске Кырлайда  Ф.Гарафиев истәлегенә район мәктәпләре арасында чаңгы ярышлары узды. Безнең мәктәп укучылары да ярышта актив катнаштылар.