Мәктәбебезнең матур традицияләреннән берсе -  ул Балалар Сабантуе. Менә быел да авылыбыз янында гына урнашкан нарат урманында, түгәрәк аланда гөрләп узды ул. Тантаналы линейка, уку алдынгыларын, спортта, җәмәгать тормышында актив укучыларны бүләкләүләр - Сабантуй әнә шулай башланып китте. Ә аннары нәкъ чын Сабантуйдагы кебек уеннар уйнадык. Капчык киеп тә йөгердек, кашыкка йомырка салып та, чүлмәк тә ваттык, аркан да тартыштык, җырлап - биеп тә бүләкләр алдык. Кайнар чәй белән коймак бигрәк тәмле булды! Урманнан барыбыз да бик канәгать булып кайттык