Бүген дәресләрдән соң татар теле укытучысы Хәбирова Мәйсәрә Фаис кызы мәктәп күләмендә Туган тел көне үткәрде. Кичә барышында туган телнең әһәмияте, байлыгы турында аңлатылды. Залда утыручылар арасында әйтемнәрне дәвам итү, телгә бәйле сорауларга җавап бирү буенча бәйге оештырылды. Соңыннан башлангыч класс укучылары ятлаган шигырьләрен тамашачылар каршына чыгып сәнгатьле итеп сөйләделәр. Кичәне район күләмендә үткәрелгән конкурсларда уңышлы чыгыш ясаган укучылар:Иске Җияш башлангыч мәктәбеннән Миргалимова Зәлия,Теләкәй мәктәбеннән Исмагилова Зәринә, Ногманова Дилә презентация белән дәвам иттеләр. Зәлия белән Зәринә бик матур итеп җырладылар. Алардан укытучылар да калышмады. Туган телгә багышланган моңлы җырлары белән Солтанова Гөлчәчәк Сәлах кызы, Миргалимова Эльвира Вакыйф кызы, Гәрәева Флүсә Сабит кызы тамашачыларны әсир иттеләр. Кичә халкыбызның "Туган тел" җырын аягүрә басып җырлап тәмамланды. Кичәне үзенең гармун моңнары белән авылыбызның мәшһүр баянчысы Тимиров Рәсүл Хәмит улы ямьләндереп торды.Кичә бик күңелле үтте.