“Белем җәүһәрләре” дип исемләнгән Бөтендөнья интернет-проектлар бәйгесе “Белем.ру” җаваплылыгы чикләнгән җәмгыяте тарафыннан Татарстан Республикасы Мәгариф һәм фән министрлыгы, Татарстан Республикасы Мәдәният министрлыгы һәм Бөтендөнья татар конгрессы Башкарма комитеты белән берлектә туган телгә һәм гореф-гадәтләргә мәхәббәт тәрбияләү, интернет-технологияләр ярдәмендә татар телен һәм мәдәниятын саклау һәм үстерү, прогрессив белемле укытучылар, укучылар һәм гаиләләрне барлау максатында быел икенче мәртәбә үткәрелде.

     Бәйгенең беренче җиңүчеләрен бүләкләү тантанасы Казан шәһәренең Мәскәү райоынында урнашкан Ш.Мәрҗани исемендәге 2 нче татар гимназиясендә үткәрелгән булса, быелгы бәйгенең финалистларын һәм җиңүчеләрен бүләкләү тантанасы "Казан" милли-мәдәни үзәгендә үткәрелде.

     Тантанага бәйгенең финалистлары (финалга чыккан 29 интернет-проектның авторлары, администраторлары һәм җитәкчеләре), жюри әгъзалары, Татарстан Республикасы Дәүләт Советы һәм Татарстан Республикасы Министрлар Кабинеты вәкилләре, депутатлар һәм аларның ярдәмчеләре, төрле даирә җитәкчеләр, мәгариф һәм мәдәният өлкәсендә татар дөньясына яхшы таныш шәхесләр җыелды.

     Әлеге тантанада безнең районнан Аккүз төп гомуми белем бирү мәктәбенең информатика-математика укытучысы Шәвәлиев Дилүс Мирзасалих улы да катнашты. Аның тарафыннан ясалган сайтлар: "Аккүз мәктәбе" - "Урта белем учреждениесе - җәүһәрләр чыганагы" номинациясендә һәм "Дилүс сайты" - "Укытучы - җәүһәр" номинациясендә, икеседэ 3 нче урыннарга лаек булды. Богады төп гомуми белем бирү  мәктәбе укучысы Галимова Айсылу сайты: "Актанышым ак илем" - "Укучы - җәүһәр" номинациясендә 3 нче урын яулады.