14 февраль көнне Сәфәр урта гомуми белем бирү мәктәбендә “Компьютерда таблицалы исәпләү” темасы астында информатика укытучыларының семинары булды. Семинарда райондагы 26 мәктәпнең информатика укытучылары катнашты.

Көн тәртибенең беренче өлешендә Сәфәр урта гомуми белем бирү мәктәбенең югары категорияле информатика укытучысы Гыйлмуллина Чулпан Зөлфәт кызы 9 нчы сыйныфта “Компьютерда таблицалы исәпләү” темасына ачык дәрес уздырды. Дәрестән соң “Информатикага ... бер күрүдә гашыйк булу” дигән темага класстан тыш чара оештырды.

Көн тәртибенең икенче өлешендә информатика фәне буенча РМБ җитәкчесе итеп, бертавыштан, Гуманитар гимназия-интернатның беренче квалификацион категорияле информатика укытучысы Бакиров Радик Флорид улы сайланды.

План буенча чыгышлар тыңланды һәм “е-КМ-Школа” проекты буенча, “Иң яхшы информатика укытучысы” Гранты ияләре: Аккүз төп гомуми белем бирү мәтәбенең беренче квалификацион категорияле информатика укытучысы Шәвәлиев Дилүс Мирзасалих улы һәм Татар Ямалы төп гомуми белем бирү мәктәбенең беренче квалификацион категорияле информатика укытучысы Варина Гөлназ Сәгыйрь кызы тарафыннан информатика укытучыларын укыту оештырылды. Мәгълүмати-методик үзәкнең беренче квалификацион категорияле мәгълүмати-коммуникацион технологияләр буенча методисты Шәрипов Илназ Илшат улы “Татарстан Республикасында дәүләт муниципаль хезмәт күрсәтүен электрон рәвештә башкару” темасына чыгыш ясады, мәктәптә укучылар арасында уздырылучы “ИТ-Чемпион” конкурсы белән таныштырды һәм “Татарстан Республикасында электрон белем бирү” порталында булган яңалыкларны әйтеп узды. Шулай ук 27 нче февраль көнне 1 нче Актаныш урта гомуми белем бирү мәктәбе базасында уздырылачак “Яшь кулланучы” дип аталган район олимпиадасы турында да кыскача гына таныштырды.