2 апрель көнне Актаныш районы мәдәният хезмәткәрләре, ветераннары үзләренең һөнәри бәйрәмнәрен зурлап билгеләп үтте. Тантанада китапханә, клуб, район мәдәният йорты, музей системасы, балалар сәнгать мәктәбе белгечләре катнашты. Яңа Әлем төп гомуми белем бирү мәктәбе укытучысы Нәсимә Фатыйх кызына тантанада  катнашып, рәхмәт хаты тапшырылды.

 Халык күңеленә матурлык орлыклары салучы әлеге даирә хезмәткәрләрен  районның  Башкарма комитет җитәкчесе  Энгель Фәттахов шәхсән үзе тәбрик итте. Энгель Нәвап улы районыбызның сәнгатен үстерүдә, гореф-гадәтләрне саклауда, район, республика данын еракларга таратуда, яшь буынны тәрбияләүдә югары һөнәри осталык белән фидакарь хезмәт куюлары  өчен ихлас рәхмәт хисләрен җиткерде, киләчәк тормышларында  сәламәтлек, күңел күтәренкелеге, илһамлы иҗат һәм яңа уңышлар, гаилә иминлеге, бәрәкәтле тормыш теләде. 

Бәйрәм барышында иң яхшы хезмәткәрләргә  район башлыгының, социаль һәм агарту бүлегенең  мактау грамоталары, рәхмәт хатлары тапшырылды. Мәдәният хезмәткәрләре өчен әзерләнгән махсус  бүләк тә затлы иде – залда утыручыларга Татарстанның халык артисты Чулпан Закирова җитәкчелегендәге «Казан» бию ансамбле тарихи спектакль тәкъдим итте.